ភ្នំពេញ៖ អង្គភាពការពារកុមារ (CPU) សហការជាមួយសមត្ថកិច្ច និងភាគីពាក់ព័ន្ធផ្សេងទៀត ដើម្បីដំណើរការស៊ើបអង្កេតស៊ីជម្រៅទៅលើអត្តចរិត និងសកម្មភាពប្រចាំថ្ងៃរបស់បុរសជនជាតិអាមេរិកម្នាក់ ដែលបានធ្វើដំណើរមកកាន់ប្រទេសកម្ពុជា រហូតឃាត់ខ្លួន និងបានបណ្តេញចេញពីកម្ពុជា ពាក់ព័ន្ធបទល្មើសបៀតបៀនផ្លូវភេទលើកុមារ។

យោងតាម អង្គភាពការពារកុមារ នាថ្ងៃទី២០ ខែកុម្ភៈ ឆ្នាំ២០២៤ បានឱ្យដឹងថា ជាលទ្ធផលនៃការស៊ើបអង្កេត និងការឃ្លាំមើលសកម្មភាពទំនាក់ទំនងជាមួយកុមារ លោក Holley ត្រូវបានសមត្ថកិច្ចធ្វើការបណ្តេញចេញពីប្រទេសកម្ពុជា។

អង្គភាពបានឱ្យដឹងបន្ថែមថា ជនសង្ស័យ ឈ្មោះ Wilfred Willis Holley ធ្លាប់មានប្រវត្តិជាប់ទោសពីបទល្មើសកម្រិតធ្ងន់ដែលបានប្រព្រឹត្តទៅលើកុមារ នៅក្នុងប្រទេសផ្សេងៗមួយចំនួន និងត្រូវបានសមត្ថកិច្ចកម្ពុជាធ្វើការឃាត់ខ្លួនកាលពីថ្ងៃទី៧ ខែកុម្ភៈ ឆ្នាំ២០២៤ ដើម្បីប្រគល់ជូនអគ្គនាយកដ្ឋានអន្តោប្រវេសន៍។

ទន្ទឹមនោះ អង្គភាពការពារកុមារ បញ្ជាក់ថា លោក Holley គឺជាហានិភ័យដ៏ធំដល់កុមារ និងបានថ្លែងការកោតសរសើរដល់រាល់ស្ថាប័នដែលបានចូលរួមក្នុងការស៊ើបអង្កេតមួយនេះ និងជាពិសេសចំពោះការឆ្លើយតបរហ័សពីរាជរដ្ឋាភិបាលកម្ពុជា, អគ្គស្នងការដ្ឋាននគរបាលជាតិ និងអគ្គនាយកដ្ឋានអន្តោប្រវេសន៍ ក្នុងការបណ្តេញបុគ្គលនេះចេញពីប្រទេសកម្ពុជា។

អង្គភាពការពារកុមារលើកឡើងថា ការស៊ើបអង្កេតនេះគឺជាឧទាហរណ៍ដ៏ល្អមួយ ដែលបង្ហាញអំពីការប្តេជ្ញារបស់ស្ថាប័នពាក់ព័ន្ធទាំងអស់ ក្នុងកិច្ចការពារកុមារពីបុគ្គដូចជាលោក Holley ជាដើម ខណៈនេះជាសារដ៏សំខាន់មួយផ្ញើរជូនទៅដល់ជនបរទេសទាំងឡាយដែលគិតថា ប្រទេសកម្ពុជាមានការអត់ធ្មត់ចំពោះបុគ្គលបែបនេះ៕